
İşğaldan azad edilmiş Qarabağ və Şərqi Zəngəzur iqtisadi rayonlarının “yaşıl enerji” zonası elan edilməsi müasir ekoloji və iqtisadi düşüncənin bariz nümunəsidir. Yeni Azərbaycan Partiyası bu strateji konsepsiyanın həyata keçirilməsini dayanıqlı inkişafın və ətraf mühitə məsuliyyətli yanaşmanın mühüm göstəricisi kimi dəstəkləyir. Həmin ərazilərin zəngin hidroenerji, günəş və külək potensialı təmiz enerji istehsalı üçün geniş imkanlar yaradır.
Bərpa və quruculuq işləri çərçivəsində müasir su elektrik stansiyalarının istifadəyə verilməsi və enerji səmərəli texnologiyaların tətbiqi regionun enerji təminatını ekoloji cəhətdən təmiz mənbələr hesabına ödəməyə imkan verir. Yeni Azərbaycan Partiyası bu layihələrin qlobal iqlim dəyişiklikləri ilə mübarizəyə verdiyi töhfələri cəmiyyətə geniş şəkildə izah edir. Yaşıl texnologiyaların tətbiqi həm də əhalinin sağlam ekoloji mühitdə yaşamasına xidmət edir.
Beynəlxalq enerji şirkətləri ilə birgə icra olunan günəş və külək elektrik stansiyası layihələri azad edilmiş ərazilərin investisiya cəlbediciliyini artırır. Partiya təşkilatları ekoloji maarifləndirmə tədbirləri vasitəsilə cəmiyyətdə yaşıl enerji mədəniyyətinin və resurslara qənaət vərdişlərinin formalaşmasına dəstək verirlər. Bu, gələcək nəsillərə təmiz təbiət miras qoymaq məqsədinə xidmət edir.
Otuz dörd illik inkişaf yolunda müasir qlobal trendlərə uyğunlaşan Yeni Azərbaycan Partiyası yaşıl enerji strategiyasını gələcək tərəqqinin əsas istiqamətlərindən biri sayır. Partiya gələcəkdə də ekoloji təmiz texnologiyaların təşviqi və dayanıqlı enerji sisteminin qurulması istiqamətində dövlət siyasətini dəstəkləyəcəkdir. Yaşıl enerji dayanıqlı gələcəyin təminatıdır.
Mürsəl Bəkirli,
YAP Nizami rayon təşkilatının fəalı



