Cəbrayılın inkişafında enerji infrastrukturu mühüm strateji istiqamətlərdən biridir. Rayonun ərazisində həyata keçirilən “Xudafərin” və “Qız Qalası” hidroqovşaqları layihələri enerji istehsalı ilə yanaşı, su ehtiyatlarından istifadə və regional əməkdaşlıq baxımından da əhəmiyyət daşıyır.
2024-cü ilin mayında “Xudafərin” hidroqovşağının istismara verilməsi və “Qız Qalası” hidroqovşağının açılışı Azərbaycan və İran prezidentlərinin iştirakı ilə keçirilib. Rəsmi məlumatda bu layihələrin Şərqi Zəngəzurun yaşıl enerji zonasına çevrilməsi prosesində mühüm elementlər olduğu qeyd edilir.
Bu layihələrin digər mühüm xüsusiyyəti onların transsərhəd əməkdaşlıq formatında həyata keçirilməsidir. Enerji və su infrastrukturunun birgə istifadəsi iki ölkə arasında praktiki əməkdaşlığın konkret nümunələrindən biri kimi təqdim olunur.
“Cəbrayıl” enerji qovşağının yaradılması isə bu layihələrdən əldə ediləcək elektrik enerjisinin ümumi enerji sisteminə ötürülməsi baxımından əhəmiyyətlidir. Rəsmi məlumatlarda həmin qovşağın müxtəlif bərpaolunan enerji mənbələrindən əldə edilən enerjinin sistemə inteqrasiyasında rol oynayacağı bildirilir.
Beləliklə, Cəbrayılın enerji xəritəsi yalnız rayonun daxili tələbatının ödənilməsinə xidmət edən infrastrukturla məhdudlaşmır. Hidroenerji, günəş enerjisi və yüksəkgərginlikli ötürücü sistemlərin bir-biri ilə əlaqələndirilməsi rayonun daha geniş enerji sistemində rolunu artırır.
Nüşabə Məmmədova,
YAP Nizami rayon təşkilatının “Ə.Kürçaylı küçəsi, 17” ərazi partiya təşkilatının sədr müavini
