AnalitikaGündəmSiyasət

Heydər Əliyev və Yeni Azərbaycan Partiyasının yaranma zərurəti

1990-cı illərin əvvəlləri Azərbaycan tarixinin ən mürəkkəb dövrlərindən biri kimi yadda qalıb. Dövlət müstəqilliyinin bərpasından sonra ölkədə siyasi qarşıdurmalar, iqtisadi böhran və hərbi təhlükələr ciddi problemlər yaradırdı. Cəmiyyət sabitlik və güclü idarəçilik axtarışında idi. Belə bir şəraitdə 1992-ci il noyabrın 21-də Yeni Azərbaycan Partiyasının yaradılması xalqın siyasi gözləntilərinə cavab verən mühüm hadisəyə çevrildi.

Partiyanın yaradılması təşəbbüsü ilə çıxış edən ziyalılar Azərbaycanın gələcəyinin qorunması üçün Heydər Əliyevin rəhbərliyinə ehtiyac olduğunu bildirirdilər. Onlar Ulu Öndərin dövlətçilik təcrübəsini, siyasi iradəsini və mürəkkəb prosesləri idarə etmək bacarığını ölkənin gələcəyi baxımından mühüm amil hesab edirdilər. Naxçıvanda keçirilən təsis konfransı nəticəsində partiyanın yaradılması Azərbaycanın siyasi həyatında yeni mərhələnin əsasını qoydu.

 

Heydər Əliyevin siyasi fəaliyyəti ölkədə sabitliyin yaradılması və dövlətçiliyin möhkəmləndirilməsi ilə sıx bağlıdır. O, Azərbaycanın müstəqil dövlət kimi yaşamasını, milli maraqların qorunmasını və xalqın vahid məqsədlər ətrafında birləşməsini əsas vəzifə hesab edirdi. Onun müəyyənləşdirdiyi siyasi kurs ölkənin gələcək inkişaf istiqamətlərini müəyyən edən mühüm amilə çevrildi.

Yeni Azərbaycan Partiyası bu siyasi ideyaların ətrafında birləşən insanların təşkilatı kimi fəaliyyətə başladı. Partiyanın proqramında müstəqilliyin qorunması, dövlət idarəçiliyinin möhkəmləndirilməsi, iqtisadi inkişaf və sosial rifahın yüksəldilməsi əsas istiqamətlər kimi müəyyənləşdirildi. Zaman keçdikcə partiya ölkənin ictimai-siyasi həyatında aparıcı mövqeyə yüksəldi.

Bu gün partiyanın 34 illik yubileyi Heydər Əliyevin tarixi xidmətlərini və onun yaratdığı siyasi irsin əhəmiyyətini bir daha xatırladır. Yeni Azərbaycan Partiyasının yaranması xalqın güclü dövlətə və sabit gələcəyə olan inamının ifadəsi idi. Həmin ideyaların qorunması və müasir dövrün çağırışlarına uyğun inkişaf etdirilməsi Azərbaycanın gələcəyi üçün mühüm əhəmiyyət daşıyır.

Elnarə Məmtiyeva,
YAP Nizami rayon təşkilatının “Naxçıvanski küçəsi, 37” ərazi partiya təşkilatının sədr müavini

Oxşar Xəbərlər

Back to top button