Şuşa Azərbaycan tarixində, mədəniyyətində və ruhunda xüsusi yerə sahib olan müqəddəs bir şəhərdir. Qarabağın səmalarında ucalan bu şəhər əsrlər boyu Azərbaycan musiqisinin, poeziyasının və mənəviyyatının mərkəzi kimi tanınıb. Şuşa yalnız bir coğrafi məkan deyil — o, xalqımızın kimliyinin, milli özünüdərkimizin, tarixi yaddaşımızın canlı simvoludur.
Şuşa şəhəri 1752-ci ildə məşhur sərkərdə və dövlət xadimi Pənahəli xan tərəfindən salınıb. Qısa müddətdə şəhər Qarabağ xanlığının siyasi, hərbi və mədəni mərkəzinə çevrilmişdir. Şuşa həm də “Qafqazın konservatoriyası” kimi tanınırdı. Çünki burada Üzeyir Hacıbəyli, Bülbül, Qəmbər Hüseynli, Seyid Şuşinski kimi böyük sənətkarlar doğulmuş və fəaliyyət göstərmişlər. Şəhərin hər daşı, hər küçəsi milli musiqimizin səsi, tarın və kamanın nəfəsi ilə yoğrulmuşdur.
Lakin Şuşa uzun illər işğal altında qaldı. Bu illər ərzində Azərbaycan xalqının qəlbində Şuşaya qayıdış arzusu heç vaxt sönmədi. Hər bir azərbaycanlı üçün Şuşa yalnız itirilmiş torpaq deyildi — o, ruhun yarası, qəlbin nisgili idi. 2020-ci il noyabrın 8-də Şuşa qəhrəman Azərbaycan Ordusu tərəfindən işğaldan azad edildi. Şuşanın azad edilməsi təkcə hərbi qələbə deyil, həm də tarixi ədalətin bərpası idi.
Bu gün Şuşa yenidən doğulur. Şəhərdə bərpa və yenidənqurma işləri geniş şəkildə aparılır, mədəni tədbirlər, konsertlər, beynəlxalq festivallar təşkil olunur. 2022-ci ildə Şuşa Türk Dünyasının Mədəniyyət Paytaxtı, 2023-cü ildə isə İslam Dünyası Mədəniyyət Paytaxtı elan olunmuşdur. Bu, Şuşanın yenidən öz əvvəlki mədəni mövqeyinə qayıtdığının sübutudur.
Şuşa şəhəri günü də məhz bu qürur hissinin, milli birlik və dirçəlişin qeyd olunduğu gündür. Bu gün biz yalnız şəhərin tarixi əhəmiyyətini deyil, həm də onun yenidən dirçəlişini, mədəniyyətimizin yaşamasını və gələcəyə inamımızı qeyd edirik.
Şuşa əbədidir, çünki onun ruhu xalqımızın ruhundadır.
Şuşa bizim qəlbimizin zirvəsidir.
Və bu zirvədə həmişə Azərbaycan bayrağı dalğalanacaq.
Ələkbərova Nazlı,
YAP-ın gənc fəalı
