Azərbaycan ilə Türkmənistan arasında mövcud olan dostluq münasibətləri bu gün yeni məzmun qazanaraq strateji əməkdaşlığın ən uğurlu nümunələrindən birinə çevrilib. Prezident İlham Əliyev və Prezident Sərdar Berdiməhəmmədov arasında keçirilən görüşlər göstərir ki, iki qardaş dövlət qarşılıqlı maraqlara söykənən münasibətləri daha da inkişaf etdirməkdə qərarlıdır. İmzalanan sənədlər və əldə olunan razılaşmalar gələcək əməkdaşlıq üçün möhkəm zəmin yaradır.
Azərbaycan və Türkmənistan ortaq tarixə, dilə, mədəniyyətə və milli-mənəvi dəyərlərə malik xalqlardır. Bu ortaq irs dövlətlərarası münasibətlərin inkişafına mühüm təsir göstərir. Son illərdə yüksək səviyyəli qarşılıqlı səfərlər, siyasi dialoqun intensivləşməsi və birgə layihələrin həyata keçirilməsi münasibətlərin daha da dərinləşməsinə şərait yaradıb.
Prezident İlham Əliyevin qeyd etdiyi kimi, siyasi qarşılıqlı etimad olmadan böyük layihələrin həyata keçirilməsi mümkün deyil. Məhz dövlət başçılarının qətiyyətli iradəsi nəticəsində Azərbaycan ilə Türkmənistan arasında əməkdaşlıq təkcə ikitərəfli münasibətlərlə məhdudlaşmır, eyni zamanda regional və beynəlxalq platformalarda da uğurla davam etdirilir. Bu əməkdaşlıq regionun sabitliyi və təhlükəsizliyi baxımından xüsusi əhəmiyyət daşıyır.
Xəzər dənizinin hər iki sahilində yerləşən Azərbaycan və Türkmənistan nəqliyyat-logistika sahəsində böyük potensiala malikdir. Müasir limanlar, dəmir yolları və beynəlxalq nəqliyyat dəhlizləri Asiya ilə Avropa arasında yükdaşımaların həcmini artırmağa imkan verir. Bu istiqamətdə atılan addımlar yalnız iki ölkəyə deyil, bütövlükdə regionun iqtisadi inkişafına mühüm töhfə verir.
Əməkdaşlığın digər vacib istiqamətlərindən biri enerji sahəsidir. Hər iki ölkə zəngin enerji ehtiyatlarına malik olmaqla beynəlxalq enerji təhlükəsizliyində mühüm rol oynayır. Qarşılıqlı maraqlar əsasında həyata keçirilən layihələr enerji resurslarının daha səmərəli istifadəsinə və yeni bazarlara çıxış imkanlarının genişlənməsinə xidmət edir.
Mədəni-humanitar sahədə əlaqələrin inkişafı da xüsusi diqqət çəkir. Qarşılıqlı Mədəniyyət Günlərinin keçirilməsi, yaradıcı kollektivlərin çıxışları, qardaş şəhərlər arasında əməkdaşlıq və humanitar layihələr xalqlar arasında dostluq münasibətlərini daha da möhkəmləndirir. Bu istiqamətdə görülən işlər gələcək nəsillərin də ortaq dəyərlər ətrafında birləşməsinə şərait yaradır.
Bu gün Azərbaycan və Türkmənistan arasında formalaşmış əməkdaşlıq modeli region üçün nümunə hesab oluna bilər. Qarşılıqlı hörmətə, etimada və bərabərhüquqlu tərəfdaşlığa əsaslanan bu münasibətlər gələcəkdə də yeni uğurlarla zənginləşəcək, regionda sülhün, sabitliyin və davamlı inkişafın təmin olunmasına mühüm töhfə verməyə davam edəcəkdir.
Zeynəb Hacıyeva,
YAP Nizami rayon təşkilatının fəalı
