28 May 2025-ci il – Azərbaycanın müstəqillik tarixində əlamətdar bir gün. Bu gün həm də dövlətçiliyimizin əsasının qoyulduğu 1918-ci il Azərbaycan Xalq Cümhuriyyətinin ildönümüdür. Lakin bu ilki 28 May fərqli və tarixi bir rəng aldı. Prezident İlham Əliyevin Laçın şəhərində etdiyi çıxış təkcə bayram nitqi deyildi – bu, suverenliyimizin tam bərpasının, xalqımızın qürurunun və milli birliyimizin təntənəsi idi. Azərbaycan Respublikasının Prezidenti İlham Əliyev Laçın şəhərində çıxışı zamanı həm tarixi baxış, həm də strateji perspektiv təqdim etdi. O, Azərbaycanın azad edilmiş ərazilərində aparılan bərpa-quruculuq işləri, bu ərazilərin gələcəyi və vətəndaşların təhlükəsiz şəkildə öz doğma yurdlarına qayıdışı ilə bağlı əhəmiyyətli fikirlər söylədi. Bu çıxış bir daha göstərdi ki, Azərbaycan post-münaqişə dövründə nəinki öz ərazi bütövlüyünü bərpa etmiş, eyni zamanda Cənubi Qafqazda yeni reallıqlar yaradaraq regional liderə çevrilmişdir. Prezidentin Laçında çıxış etməsi, bu şəhərin artıq tamamilə Azərbaycanın suveren nəzarəti altında olmasının, burada həyatın yenidən dirçəlməsinin və dövlətin hər qarış torpağa sahib çıxmasının rəmzidir. Cənab Prezident çıxışında qeyd etdi ki, “Laçın şəhəri 2022-ci ilin avqustunda Azərbaycan ordusu tərəfindən tam nəzarətə götürüldü və bu, tarixi bir nailiyyət idi”. Bu sözlər, ordumuzun gücü və dövlətimizin qətiyyətinin təzahürü idi. Çıxışda xüsusilə diqqət çəkən məqamlar arasında bölgədə gedən genişmiqyaslı bərpa işləri, “Böyük Qayıdış” proqramının gedişi və Azərbaycanın dayanıqlı inkişaf hədəfləri yer aldı. İlham Əliyev vurğuladı ki, təkcə Laçın deyil, digər azad edilmiş şəhər və kəndlərimiz də qısa müddətdə dirçələcək, burada müasir infrastruktur yaradılacaq və keçmiş məcburi köçkünlər öz yurdlarına qürurla dönəcəklər. Prezidentin çıxışında bir məqam xüsusilə vurğulandı: “Bu torpaqların sahibi Azərbaycan xalqıdır və heç kim bu reallığı dəyişə bilməz.” Bu bəyanat Azərbaycanın suverenliyinə və milli iradəsinə edilən hər cür müdaxiləyə cavab kimi qiymətləndirilməlidir. Prezident İlham Əliyevin çıxışı həm daxili auditoriyaya – Azərbaycan xalqına güvən və ruh yüksəkliyi aşılayırdı, həm də beynəlxalq ictimaiyyətə açıq mesaj idi: Azərbaycan dövləti sülhə, inkişaf və regional əməkdaşlığa sadiqdir, lakin ərazi bütövlüyü və suverenliyi məsələsində heç bir güzəştə gedilməyəcək. Laçında səslənən bu çıxış həm də tarixə bir çağırış idi. Uzun illər işğal altında qalan bu torpaqlarda indi Azərbaycan bayrağı dalğalanır və dövlət başçısının ayaq basdığı hər qarış torpaq bir daha təsdiqləyir ki, bu torpaqlar əbədi olaraq Azərbaycana məxsusdur. Bu tarixi nitq 28 May – Respublika Gününün mahiyyətini daha da gücləndirdi: bu gün Azərbaycan xalqının azadlıq, müstəqillik və vətənə bağlılıq günüdür. Prezident İlham Əliyevin liderliyi ilə bu ideyalar təkcə sözlə deyil, əməli işlərlə təsdiqlənir və xalqımıza parlaq gələcək vəd edir.
Mirsadıq Səməndərli,
Yeni Azərbaycan Partiyası, məsləhətçi
