Prezident İlham Əliyevin Səudiyyə Ərəbistanının “Əl-Ərəbiyyə” telekanalına verdiyi müsahibə Azərbaycanın bölgədə qazandığı qələbədən sonra yaratdığı yeni reallığın dünyaya çatdırılması baxımından mühüm əhəmiyyət daşıyır. Dövlət başçısı müsahibədə açıq şəkildə bildirdi ki, münaqişə dövrü artıq arxada qalıb və qarşıda duran əsas hədəf Ermənistanla sülh müqaviləsinin imzalanmasıdır. Onun sözlərinə görə, sənədin mətni razılaşdırılıb, lakin Ermənistan konstitusiyasında Azərbaycanın ərazi bütövlüyünə zidd müddəalar aradan qaldırılmadan imzalama mərhələsi mümkün olmayacaq. Bu, Azərbaycanın mövqeyinin prinsipial və dəyişməz olduğunu bir daha göstərir.
Prezident İlham Əliyev müsahibədə Zəngəzur dəhlizi mövzusuna da xüsusi yer ayırdı. O qeyd etdi ki, bu yol təkcə Azərbaycanın Naxçıvanla birləşməsi üçün deyil, həm də bütün regionun iqtisadi inteqrasiyası üçün vacibdir. Dövlət başçısı vurğuladı ki, Azərbaycan güclü ordusu ilə bu məqsədə asanlıqla nail ola bilərdi, amma ölkəmiz zor gücü ilə deyil, qarşılıqlı anlaşma və dialoq yolu ilə bu məsələnin həllini üstün tutur. Bu yanaşma həm Azərbaycanın siyasi məsuliyyətini, həm də regiona sülh və əməkdaşlıq təklifini nümayiş etdirir.
Müsahibə zamanı böyük dövlətlərlə münasibətlər də diqqət mərkəzində oldu. İlham Əliyev açıq şəkildə bəyan etdi ki, Azərbaycan heç bir tərəfin təzyiqini qəbul etmir və ölkəyə qarşı hər hansı hörmətsiz yanaşmaya cavab verməkdə qətiyyətlidir. Bu, Azərbaycanın müstəqil xarici siyasət kursunun dəyişməz prinsiplərindən biridir. Prezident eyni zamanda Ukraynanın suverenliyi və ərazi bütövlüyünü dəstəklədiklərini vurğulayaraq, Azərbaycanın beynəlxalq siyasətdə ardıcıl və prinsipial mövqeyini ortaya qoydu.
Ümumilikdə, “Əl-Ərəbiyyə” telekanalına müsahibə Azərbaycanın regional lider kimi mövqeyini, qalib ölkə olaraq sülhə və inkişafa yönəlmiş strategiyasını nümayiş etdirdi. İlham Əliyevin fikirlərində həm qələbənin gücü, həm də yeni mərhələnin məsuliyyəti aydın hiss olunurdu. Bu çıxış bir daha təsdiqlədi ki, Azərbaycan təkcə öz gələcəyini deyil, həm də bütün regionun gələcəyini sülh, sabitlik və əməkdaşlıq üzərində qurmaq niyyətindədir.
Rəna Süleymanlı,
Yeni Azərbaycan Partiyası, məsləhətçi
