Azərbaycanın qəhrəmanlıq salnaməsinə qızıl hərflərlə yazılan tarixlərdən biri 17 oktyabrdır. Bu gün Füzuli şəhərinin erməni işğalından azad olunduğu gündür və hər il ölkəmizdə “Füzuli Şəhər Günü” kimi qeyd olunur.
Füzuli şəhəri 1993-cü ildə düşmən tərəfindən işğal edilmiş, 27 il müddətində tamamilə dağıdılmışdı. Lakin 2020-ci ilin payızında başlayan Vətən müharibəsində, Ali Baş Komandan İlham Əliyevin rəhbərliyi ilə rəşadətli Azərbaycan Ordusu Füzulini 17 oktyabr 2020-ci il tarixində azad etdi. Bu xəbər xalqımıza böyük sevinc və qürur hissi yaşatdı.
Füzulinin azad olunması Vətən müharibəsində strateji dönüş nöqtəsi oldu. Bu qələbə ilə ordumuz növbəti mərhələdə Şuşa istiqamətində irəlilədi və müharibənin son qələbəsinə aparan yol açıldı.
Bu gün Füzuli şəhəri yenidən qurulur və dirçəlir. Qısa müddətdə burada beynəlxalq hava limanı, yeni yollar, məktəblər, xəstəxanalar və müasir yaşayış binaları inşa olunub. Füzuli indi ağıllı şəhər modelinə əsasən bərpa olunur.
“Füzuli Şəhər Günü” bizə xalqımızın birliyini, qəhrəman ordumuzun gücünü və dövlətimizin qüdrətini xatırladır. Bu gün həm şəhidlərimizin ruhuna ehtiram göstərilir, həm də azadlığın dəyəri bir daha xatırlanır.
Füzuli bu gün Zəfərin, dirçəlişin və qürurun şəhəri kimi tarixdə əbədi yaşayacaq.
Yeni Azərbaycan Partiyasının Gənc Fealı
