Təbii ehtiyatlardan istifadə zamanı iqtisadi maraqlarla ekoloji təhlükəsizlik arasında tarazlığın qorunması mühüm məsələdir. Dağ-mədən sənayesi böyük istehsal imkanları yaratmaqla yanaşı, düzgün idarə olunmadıqda ətraf mühitə müəyyən təsirlər göstərə bilər. Buna görə yeni Dövlət Proqramının icrası zamanı ekoloji standartlara əməl edilməsi xüsusi əhəmiyyət daşıyır.
Prezident İlham Əliyev müşavirədə Azərbaycanın əsas sərvətinin yalnız yeraltı ehtiyatlardan ibarət olmadığını, təbiətin qorunmasının da mühüm əhəmiyyət daşıdığını vurğulayıb. Yeni layihələr üzrə maksimum ekoloji ekspertizanın aparılması və yüksək standartların tətbiqi qarşıya qoyulan əsas tələblərdəndir. Bu yanaşma mədən sənayesində müasir ekoloji idarəetmənin tətbiqini zəruri edir.
Ekoloji təhlükəsizlik yatağın istismara verilməsindən əvvəl başlamalıdır. Ərazinin ilkin ekoloji vəziyyətinin öyrənilməsi, su ehtiyatlarının qiymətləndirilməsi, tullantıların idarə olunması və istehsal prosesinin mümkün təsirlərinin müəyyənləşdirilməsi vacibdir. Sonrakı mərhələdə mütəmadi monitorinq aparılmalı və müəyyən edilmiş normalara əməl olunması təmin edilməlidir.
Xüsusilə Qarabağ və Şərqi Zəngəzurda ekoloji məsuliyyətin yüksək səviyyədə təmin olunması vacibdir. Bərpa və yenidənqurma prosesinin aparıldığı ərazilərdə təbii landşaftların qorunması uzunmüddətli inkişafın mühüm şərtidir. Dağ-mədən layihələrinin də bu yanaşma əsasında həyata keçirilməsi iqtisadi fəaliyyətlə ekoloji dayanıqlılığın uzlaşdırılmasına imkan verə bilər.
Həqiqət Gülalıyeva,
YAP Nizami rayon təşkilatının “Qara Qarayev prospekti, 73b” ərazi partiya təşkilatının sədri
