21 aprel 2025-ci ildə Azərbaycan Respublikasının Prezidenti İlham Əliyev Çinin rəsmi Sinxua agentliyinə verdiyi müsahibəsində Azərbaycan-Çin münasibətlərinin inkişafı, strateji tərəfdaşlığın dərinləşməsi və qarşılıqlı əməkdaşlığın perspektivləri barədə ətraflı məlumat verib. Prezident Əliyev bildirib ki, Azərbaycan ilə Çin arasında diplomatik münasibətlərin qurulmasından bəri əlaqələr qarşılıqlı hörmət və etimada əsaslanaraq davamlı inkişaf edir. O, 2024-cü ilin iyul ayında Astana şəhərində keçirilən Şanxay Əməkdaşlıq Təşkilatının sammitində imzalanan Strateji Tərəfdaşlıq haqqında Birgə Bəyanatın bu münasibətlərin inkişafında mühüm mərhələ olduğunu vurğulayıb. Prezident Əliyev Azərbaycan ilə Çin arasında iqtisadi əməkdaşlığın genişləndiyini və qarşılıqlı investisiyaların artdığını qeyd edib. O, Azərbaycanın “Bir Kəmər, Bir Yol” təşəbbüsündə fəal iştirak etdiyini və bu çərçivədə nəqliyyat və logistika sahəsində əməkdaşlığın genişləndiyini bildirib. Müsahibədə mədəni və akademik sahələrdə əməkdaşlığın da inkişaf etdiyi vurğulanıb. Prezident Əliyev Çin universitetlərinin Azərbaycanda filiallarının açılmasını və tələbə mübadiləsinin genişləndirilməsini iki ölkə arasında mədəni əlaqələrin gücləndirilməsi baxımından əhəmiyyətli addımlar kimi dəyərləndirib. Prezident Əliyev Azərbaycanın Qlobal Cənub ölkələrinin maraqlarını müdafiə etdiyini və bu çərçivədə Çin ilə əməkdaşlığın əhəmiyyətini vurğulayıb. O, Azərbaycanın və Çinin beynəlxalq münasibətlərdə ədalət, bərabərlik və qarşılıqlı hörmət prinsiplərinə əsaslanan siyasət yürütməsinin vacibliyini qeyd edib . Prezident İlham Əliyevin Sinxua agentliyinə verdiyi müsahibə Azərbaycan-Çin münasibətlərinin strateji tərəfdaşlıq səviyyəsinə yüksəldiyini və bu əməkdaşlığın müxtəlif sahələrdə uğurla inkişaf etdiyini göstərir. Bu müsahibə, eyni zamanda, Azərbaycanın beynəlxalq arenada fəal və balanslı xarici siyasətinin bir nümunəsidir. Son illərdə Azərbaycanla Çin arasında səmərəli investisiya əməkdaşlığı həyata keçirilir. Çin şirkətlərinin Azərbaycanda fəaliyyəti sənaye, enerji, infrastruktur, informasiya texnologiyaları, ticarət, kənd təsərrüfatı və digər sahələri əhatə edir. Keçən ilin sonlarına olan məlumata görə, Çinin 1995-ci ildən indiyədək Azərbaycana yatırdığı birbaşa investisiyanın həcmi 920 milyon dollara çatıb (Azərbaycanın Çinə sərmayə qoyuluşu isə bundan təqribən 2 dəfə çoxdur). Azərbaycanda Çin investisiyalı 275 şirkət qeydiyyatdan keçib. Azərbaycanın işğaldan azad edilən ərazilərində başlanan infrastruktur layihələrində iştirak üçün Çin şirkətləri müraciət edib.
İsmayıl Nağızadə,
Yeni Azərbaycan Partiyası, məsləhətçi
