XIII Qlobal Bakı Forumunda çıxış edən Cənab İlham Əliyev dünya siyasətində baş verən dəyişikliklər fonunda Azərbaycanın artan geosiyasi və iqtisadi roluna diqqət çəkdi. “Keçid dövründə olan dünyada fikir ayrılıqlarının aradan qaldırılması” mövzusunda keçirilən forumda Cənab Prezident xüsusilə Azərbaycanın beynəlxalq nəqliyyat və enerji layihələrində tutduğu strateji mövqeni vurğulayaraq qeyd etdi: “Bu gün biz Şərq-Qərb və Şimal-Cənub dəhlizləri üzrə əvəzolunmaz tərəfdaşıq.” Bu fikir Azərbaycanın regionda formalaşdırdığı yeni əməkdaşlıq mühitinin və qlobal logistika sistemində artan əhəmiyyətinin göstəricisi kimi qiymətləndirilə bilər.Son illərdə dünya nizamı sürətlə dəyişir, yeni iqtisadi və siyasi mərkəzlər formalaşır. Belə bir dövrdə ölkələr arasında əməkdaşlığın gücləndirilməsi, xüsusilə nəqliyyat və enerji sahələrində qarşılıqlı asılılığın artırılması böyük əhəmiyyət kəsb edir. Azərbaycan isə coğrafi mövqeyi və həyata keçirdiyi iri infrastruktur layihələri sayəsində bu prosesdə mühüm rol oynayır. Prezidentin çıxışında vurğuladığı kimi, ölkə artıq yalnız region üçün deyil, daha geniş coğrafiya üçün strateji tərəfdaş kimi qəbul edilir. Azərbaycanın iştirak etdiyi əsas layihələrdən biri Şərq-Qərb nəqliyyat dəhlizidir. Bu marşrut Asiyanı Avropa ilə birləşdirərək malların daha sürətli və təhlükəsiz daşınmasını təmin edir.
Azərbaycanın bu dəhlizdə aktiv iştirakı ölkənin tranzit potensialını əhəmiyyətli dərəcədə artırıb. Limanların, dəmir yollarının və logistika mərkəzlərinin modernləşdirilməsi nəticəsində ölkə qlobal ticarət zəncirində mühüm qovşağa çevrilib. Bu isə təkcə iqtisadi dividentlər deyil, həm də siyasi nüfuz baxımından Azərbaycan üçün mühüm üstünlüklər yaradır.Digər mühüm istiqamət isə Şimal-Cənub nəqliyyat dəhlizidir. Bu layihə Avropanı, Rusiyanı və Qafqazı Yaxın Şərq və Cənubi Asiya ilə birləşdirən mühüm ticarət marşrutudur. Azərbaycanın bu layihədə fəal iştirakı region ölkələri arasında əməkdaşlığın genişlənməsinə töhfə verir. İnfrastrukturun inkişafı, tranzit imkanlarının genişləndirilməsi və logistika xidmətlərinin təkmilləşdirilməsi sayəsində ölkə beynəlxalq ticarət üçün etibarlı tərəfdaş kimi mövqeyini möhkəmləndirir. Forumun keçirildiyi Global Baku Forum müxtəlif ölkələrdən siyasətçiləri, ekspertləri və beynəlxalq təşkilatların nümayəndələrini bir araya gətirərək qlobal problemlərin müzakirəsi üçün mühüm platforma rolunu oynayır.
Bu tədbir Azərbaycanın beynəlxalq dialoq və əməkdaşlıq təşəbbüslərinə verdiyi töhfənin bariz nümunəsidir. Prezident İlham Əliyevin çıxışında da məhz bu dialoq və əməkdaşlığın vacibliyi xüsusi vurğulandı. Bugünkü mürəkkəb geosiyasi şəraitdə nəqliyyat və enerji dəhlizləri yalnız iqtisadi layihələr deyil, həm də ölkələr arasında etimad və sabitlik yaradan mühüm mexanizmlərdir. Azərbaycan isə balanslaşdırılmış xarici siyasəti, regional təşəbbüsləri və infrastruktur investisiyaları ilə bu prosesin aktiv iştirakçısına çevrilib. Prezidentin qeyd etdiyi kimi, ölkənin Şərq-Qərb və Şimal-Cənub dəhlizlərində əvəzolunmaz tərəfdaş olması təsadüfi deyil, uzun illər aparılan məqsədyönlü siyasətin nəticəsidir. Beləliklə, XIII Qlobal Bakı Forumunda səsləndirilən fikirlər Azərbaycanın qlobal miqyasda artan rolunu bir daha nümayiş etdirdi. Ölkə yalnız enerji və nəqliyyat sahəsində deyil, həm də beynəlxalq dialoqun təşviqində mühüm platforma rolunu oynayaraq regionda sabitliyin və əməkdaşlığın gücləndirilməsinə töhfə verməyə davam edir.
Sahil Əliyev,
Yeni Azərbaycan Partiyası,məsləhətçi
