Azərbaycan tarixinin ən şanlı səhifələrindən biri Şuşa Zəfəri yüzillərlə çəkən həsrətin, mübarizənin və xalq birliyinin parlaq nəticəsidir. Bu zəfər təkcə bir şəhərin azadlığı deyil, həm də Azərbaycan xalqının əzmini, milli ruhunu və ədalətə inamını dünyaya göstərən bir hadisədir. Lakin bu zəfərə gedən yol asan olmayıb o, həm acılarla, həm də qəhrəmanlıqla dolu uzun bir tarixdən keçib.
Şuşa XIX əsrdən bəri Qarabağın mədəni, siyasi və strateji mərkəzi kimi tanınıb. Lakin XX əsrin sonlarında 1992-ci ilin mayında şəhər erməni silahlı qüvvələri tərəfindən işğal olundu. Bu, təkcə Azərbaycan xalqının deyil, bütün türk dünyasının ürəyinə saplanan bir yara idi. Şuşanın işğalı ilə minlərlə insan doğma yurdunu tərk etməyə məcbur oldu, Azərbaycan xalqı isə ədalətin bərpası ümidi ilə yaşadı.
Bu ümid illərlə sönmədi. Azərbaycan xalqı torpaqlarının azadlığına inanaraq ordu quruculuğunu, milli birliyi və dövlətçiliyi gücləndirdi. Prezident İlham Əliyevin rəhbərliyi ilə ölkə iqtisadi və hərbi cəhətdən gücləndi, xalqın ürəyində isə “Qarabağ Azərbaycandır!” şüarı əbədi bir inam rəmzinə çevrildi.
2020-ci ilin Vətən müharibəsi həmin inamın reallığa çevrildiyi an oldu. Azərbaycan Ordusu cəmi 44 gün ərzində düşmənin illərlə qurduğu istehkamları yararaq tarixi torpaqları azad etdi. Bu qəhrəmanlıq salnaməsinin zirvəsi isə Şuşa əməliyyatı idi. Düşmənin ağır silahlarla qoruduğu şəhərə Azərbaycan əsgəri əl qumbarası və ruh gücü ilə daxil oldu. Dağlardan, meşələrdən keçərək, əlbəyaxa döyüşlərlə Şuşaya qalxan igidlər bu torpağa azadlıq gətirdilər.
8 noyabr 2020-ci il Şuşa Zəfəri günü Azərbaycanın qürur, ləyaqət və milli birliyinin simvoluna çevrildi. Bu gün təkcə hərbi qələbə deyil, həm də milli kimliyimizin, mədəni irsimizin və ədalətin bərpasının təntənəsidir.
Şuşa Zəfərinə gedən uzun yol inamın, vətən sevgisinin və birliyin yoludur. Bu yol bizə göstərdi ki, torpaq yalnız üzərində yaşayanların deyil, onun uğrunda can verənlərin və onu sevməyi bacaranların haqqıdır. Şuşa azaddır, Qarabağ azaddır bu, Azərbaycan xalqının sonsuz iradəsinin bəhrəsidir.
Mətanət Cəfərova,
Yeni Azərbaycan Partiyası, məsləhətçi
