Zəfərdən sonra Qarabağda başlayan yeni həyat
Azərbaycanın 2020-ci ildə qazandığı tarixi Qələbə işğaldan azad edilmiş ərazilərdə yeni həyatın başlanmasına zəmin yaratdı. Uzun illər doğma yurdlarından ayrı düşmüş insanların öz torpaqlarına qayıtmaq arzusu artıq real mərhələyə qədəm qoydu. Qarabağ və Şərqi Zəngəzurda genişmiqyaslı bərpa və quruculuq işlərinin başlanması Zəfərin ən mühüm nəticələrindən biridir.
İşğal dövründə bu ərazilərdə şəhər və kəndlərin infrastrukturu dağıdılmış, yaşayış evləri, tarixi abidələr və mədəniyyət ocaqları ciddi zərər görmüşdü. Azərbaycan dövləti azad edilmiş ərazilərdə yenidənqurma işlərini kompleks şəkildə həyata keçirməyə başladı. Yol, enerji, su və kommunikasiya xətlərinin çəkilməsi, yaşayış məntəqələrinin yenidən salınması və sosial obyektlərin tikintisi bu prosesin əsas istiqamətlərini təşkil edir.
Prezident İlham Əliyevin rəhbərliyi ilə həyata keçirilən Böyük Qayıdış proqramı doğma torpaqlarından məcburi köçkün düşmüş insanların mərhələli şəkildə öz yurdlarına qayıtmasını nəzərdə tutur. Müasir yaşayış komplekslərinin yaradılması, məktəblərin, xəstəxanaların və digər sosial obyektlərin tikilməsi insanların təhlükəsiz və rahat yaşayışı üçün mühüm əhəmiyyət daşıyır.
Qarabağda iqtisadi fəaliyyətin bərpası da diqqət mərkəzindədir. Kənd təsərrüfatı, turizm, sənaye və digər sahələr üzrə yeni imkanlar yaradılır. Bu ərazilərin iqtisadi potensialının reallaşdırılması həm yerli əhalinin məşğulluğuna, həm də ölkənin ümumi inkişafına töhfə verəcək.
Bu gün Qarabağda aparılan quruculuq işləri Zəfərin davamı kimi qiymətləndirilə bilər. Torpaqların azad edilməsi ilə başlayan tarixi proses onların dirçəldilməsi və insanların doğma yurdlarına qayıdışı ilə davam edir. Qarabağda yeni həyatın qurulması Azərbaycan dövlətinin gücünü, xalqımızın quruculuq əzmini və gələcəyə inamını nümayiş etdirir.
Mürsəl Bəkirli,
YAP Nizami rayon təşkilatının fəalı
