İşğal dövründə Qubadlının tarixi-mədəni irsinə ciddi ziyan dəymiş, bir sıra yaşayış məntəqələri və mədəniyyət nümunələri dağıntılara məruz qalmışdır. Buna baxmayaraq, Qubadlıya bağlılıq xalqımızın yaddaşında daim yaşayıb. Doğma yurdun unudulmaması, milli-mənəvi dəyərlərin qorunması və gələcək nəsillərə çatdırılması bu gün də mühüm əhəmiyyət daşıyır.
Qubadlının azadlığı Azərbaycanın ərazi bütövlüyünün bərpası istiqamətində tarixi hadisələrdən biri oldu. 2020-ci il oktyabrın 25-də şəhərin işğaldan azad edilməsi bölgədə yeni mərhələnin başlanğıcını qoydu. Bu qələbə həm də illərlə doğma yurd həsrəti ilə yaşayan insanların qayıdış ümidlərini gücləndirdi.
Bu gün Qubadlının tarixi simasının bərpası, mədəni irsinin qorunması və milli yaddaşın yaşadılması qarşıda duran vacib vəzifələrdəndir. Tarixi abidələrin bərpası, keçmişin öyrənilməsi və bölgənin mədəni zənginliyinin tanıdılması Qubadlının gələcək inkişafına mühüm töhfə verə bilər.
Qubadlı yalnız coğrafi məkan deyil, həm də xalqımızın tarixi yaddaşının, milli kimliyinin və doğma yurda bağlılığının rəmzidir. Bu torpağın keçmişini qorumaq, bu gününü inkişaf etdirmək və gələcəyini qurmaq hər birimiz üçün mənəvi məsuliyyətdir.
Sevinc Salayeva,
YAP Nizami rayon təşkilatının fəalı
