Cəbrayıl rayonunda Horovlu kəndinin bərpası Böyük Qayıdış çərçivəsində kənd yaşayış məkanının kompleks planlaşdırılmasına nümunədir. Kənd üçün ümumi 248 hektarlıq ərazi müəyyənləşdirilib və perspektivdə 867 ailənin, 3470 nəfərin yaşaması nəzərdə tutulub.
2025-ci ilin oktyabrında kəndin birinci mərhələsinin açılışı keçirilib. Bu mərhələdə 334 fərdi ev, 624 şagird yerlik məktəb, 220 yerlik körpələr evi-uşaq bağçası, inzibati bina, bazar kompleksi, ictimai iaşə obyektləri, tibb məntəqəsi və idman-sağlamlıq mərkəzi yaradılıb.
Bu layihənin mühüm cəhətlərindən biri yaşayışla sosial xidmətlərin eyni planlaşdırma daxilində nəzərdə tutulmasıdır. Məktəb və bağçanın olması ailələrin sosial ehtiyaclarına, tibb məntəqəsinin yaradılması sağlamlıq xidmətlərinə, bazar və iaşə obyektləri isə gündəlik iqtisadi fəaliyyətə xidmət edir.
Kəndin su təminatında tarixi kəhrizlərin bərpasından istifadə olunması da layihəyə xüsusi xüsusiyyət verir. Bu, müasir infrastrukturla yerli tarixi təcrübənin birləşdirilməsinə nümunədir.
Horovlu təcrübəsi göstərir ki, qayıdışın dayanıqlılığı üçün yaşayış evlərinin tikintisi ilə yanaşı, kəndin tam sosial-iqtisadi ekosisteminin yaradılması vacibdir. Bu baxımdan kəndin bərpası Cəbrayılın ümumi inkişaf strategiyasının mühüm komponentidir.
Pərviz Həsənov,
YAP Nizami rayon təşkilatının fəalı
