Dövlətçiliyin dayanıqlığı dövlət institutları ilə vətəndaş cəmiyyəti arasındakı münasibətlərin xarakterindən də asılıdır. Dövlət yalnız inzibati qərarlar qəbul edən struktur deyil; o, vətəndaşların hüquqlarını qoruyan, onların təhlükəsizliyini təmin edən və cəmiyyətin ümumi maraqlarını ifadə edən institutlar sistemidir. 1993-cü ildən sonrakı Azərbaycanda dövlət-vətəndaş münasibətlərinin institusional əsaslarının yenidən qurulması mühüm siyasi proseslərdən biri oldu.
Ulu Öndər Heydər Əliyevin siyasi fəaliyyətində müxtəlif sosial qruplarla görüşlərin keçirilməsi və onların problemlərinin dinlənilməsi dövlət idarəçiliyində ictimai əlaqələrin əhəmiyyətini göstərən amillərdən biri kimi qiymətləndirilə bilər. Dövlət siyasətinin hazırlanmasında cəmiyyətin müxtəlif təbəqələrinin mövqelərinin nəzərə alınması idarəetmənin sosial dayaqlarını genişləndirən mexanizmlərdən biridir.
1995-ci ildə qəbul edilən Konstitusiya dövlət-vətəndaş münasibətlərinin hüquqi çərçivəsini də müəyyənləşdirdi. İnsan və vətəndaş hüquq və azadlıqlarının təsbit olunması dövlətin vətəndaş qarşısındakı hüquqi öhdəliklərinin müəyyənləşdirilməsi baxımından mühüm mərhələ idi. Dövlət hakimiyyətinin mənbəyinin xalq olması prinsipi də konstitusion sistemin əsas müddəalarından biri kimi təsbit edildi.
Dövlət-vətəndaş münasibətlərinin digər mühüm elementi sosial məsuliyyətdir. Vətəndaşların dövlətə münasibəti yalnız hüquqlardan istifadə ilə deyil, qanunlara əməl etmək, ictimai məsuliyyət daşımaq və dövlətin inkişafında iştirak etməklə də bağlıdır. Bu qarşılıqlı münasibət dövlətçilik mədəniyyətinin formalaşmasının əsas şərtlərindən biridir.
Beləliklə, 1993-cü il, 3 oktyabr — Ulu Öndər Heydər Əliyevin Prezident seçilməsi ilə Azərbaycan tarixinin yeni mərhələsi başlandı. Bu mərhələdə dövlət-vətəndaş münasibətləri siyasi hakimiyyətlə cəmiyyət arasında münasibətdən daha geniş anlayışa çevrilərək hüquq, məsuliyyət və qarşılıqlı etimad prinsipləri üzərində qurulan institusional münasibətlər sistemi kimi inkişaf etdi.
Cabir Hacıyev,
YAP Nizami rayon təşkilatının “Azər Manafov küçəsi, 1” ərazi partiya təşkilatının sədr müavini
