Müasir dünyada dövlətlərin suverenliyi onların qlobal iqtisadi layihələrdə və nəqliyyat-logistika şəbəkələrində tutduğu strateji mövqe ilə birbaşa əlaqəlidir. 20 sentyabr qələbəsindən sonra Azərbaycanın bütün ərazisində yurisdiksiyasının təmin olunması ölkəmizin beynəlxalq nəqliyyat mərkəzi kimi rolunu misilsiz dərəcədə artırdı. Prezident İlham Əliyevin illər öncə əsasını qoyduğu və bu gün qətiyyətlə davam etdirdiyi qlobal tranzit strategiyası tam təhlükəsizlik mühitində özünün ən məhsuldar dövrünə qədəm qoymuşdur.
Qarabağda və Şərqi Zəngəzurda mövcud olan qanunsuz birləşmələrin ləğvi nəinki Azərbaycanın daxili təhlükəsizliyini, həm də Şərq-Qərb və Şimal-Cənub nəqliyyat dəhlizlərinin davamlı fəaliyyətini tam sığortaladı. Prezident İlham Əliyev beynəlxalq tədbirlərdə xüsusi olaraq qeyd edir ki, Azərbaycanın suveren ərazisində istənilən logistika layihəsinin icrası ancaq ölkəmizin milli maraqlarına uyğun şəkildə və tam nəzarəti altında mümkündür. Bu mövqe Azərbaycanın qlobal iqtisadiyyatdakı həlledici rolunu möhkəmləndirir.
Azad edilmiş ərazilərdə salınan yeni yollar, inşası davam edən dəmir yolu xətləri və regionu xarici bazarlara bağlayacaq Zəngəzur dəhlizi konsepti bilavasitə suverenliyimizin iqtisadi bəhrələridir. Prezident İlham Əliyev tərəfindən həyata keçirilən məqsədyönlü infrastruktur siyasəti xarici sərmayədarların ölkəmizə olan inamını ən yüksək həddə çatdırıb. “Boz zona”ların məhvi xarici sərmayələrin qeyri-neft sektoruna və logistika sahəsinə axınını sürətləndirən ən vacib amil oldu.
Beləliklə, Dövlət Suverenliyi Günü təkcə hərbi qələbənin deyil, həm də Azərbaycanın qlobal logistika və tranzit mərkəzi kimi suveren hüquqlarının rəsmiləşdiyi bir tarixdir. Prezident İlham Əliyevin rəhbərliyi ilə həyata keçirilən nəqliyyat siyasəti dövlətimizə böyük siyasi dividentlər və dayanıqlı iqtisadi gəlirlər qazandıraraq müstəqilliyimizi daha da gücləndirir.
Günel Kərimova,
YAP Nizami rayon təşkilatının fəalı
