Laçın qayıdışın, quruculuğun və gələcəyin ünvanıdır
“26 Avqust – Laçın Şəhəri Günü müasir Azərbaycan tarixində azadlıq, dövlətçilik iradəsi və doğma yurda qayıdışın rəmzinə çevrilmiş əlamətdar tarixlərdən biridir. Bu gün yalnız Laçının azadlığının qeyd edilməsi deyil, həm də Azərbaycanın ərazi bütövlüyünün bərpasından sonra başladığı böyük quruculuq mərhələsinin mahiyyətini ifadə edir”.
Bunu Yeni Azərbaycan Partiyası Nizami rayon təşkilatının sədri Ramil Vəlibəyov deyib.
Ramil Vəlibəyov bildirib ki, Laçının strateji əhəmiyyəti onun coğrafi mövqeyi ilə yanaşı, Azərbaycanın Qarabağ və Şərqi Zəngəzur üzərində suverenliyinin təmin olunmasındakı xüsusi rolu ilə bağlıdır: “2020-ci il Vətən müharibəsinin nəticələrinə əsasən Laçın rayonu dekabrın 1-də Azərbaycana qaytarılsa da, Laçın şəhəri, Zabux və Sus yaşayış məntəqələri bir müddət əvvəlki dəhliz marşrutunda qalırdı. Yeni alternativ yolun yaradılmasından sonra 2022-ci il avqustun 26-da Azərbaycan Ordusu Laçın şəhərinə yerləşdi və şəhərdə Dövlət Bayrağı ucaldıldı. Bu hadisə postmüharibə dövrünün mühüm siyasi-strateji mərhələlərindən biri oldu. Bu gün Laçının əhəmiyyəti artıq yalnız onun azadlıq tarixində deyil, sürətlə dəyişən simasında görünür. Şəhərdə yaşayış məhəllələrinin, sosial obyektlərin, yolların, enerji və kommunal infrastrukturların yaradılması, istehsal və məşğulluq imkanlarının formalaşdırılması Böyük Qayıdışın sistemli dövlət siyasətinə çevrildiyini nümayiş etdirir. Laçın yenidən insanların yaşadığı, işlədiyi və gələcəyini qurduğu şəhərə çevrilir. Məhz buna görə Laçının dirçəlişini sadəcə bərpa prosesi kimi qiymətləndirmək kifayət deyil. Burada yeni şəhər mühitinin yaradılması Azərbaycanın azad edilmiş ərazilərə yanaşmasının əsas fəlsəfəsini göstərir: məqsəd keçmişi olduğu kimi bərpa etmək deyil, müasir və dayanıqlı yaşayış məkanları formalaşdırmaqdır”.
“Laçına qayıdan hər bir ailə isə bu prosesin ən mühüm göstəricisidir” – deyən Ramil Vəlibəyov əlavə edib ki, Böyük Qayıdışın əsas mahiyyəti tikilən binalarda deyil, həmin evlərdə yenidən yanan işıqlarda, doğma torpaqda qurulan ailə həyatında və bərpa olunan sosial yaddaşdadır: “26 Avqust buna görə həm Zəfərin yaddaşı, həm Qayıdışın təntənəsi, həm də gələcəyin başlanğıcıdır. Dünənin işğal xəritəsində olan Laçın bu gün Azərbaycanın quruculuq və inkişaf xəritəsində xüsusi yer tutur. Laçının yeni həyatı göstərir ki, azad edilmiş torpaqlara qayıdış yalnız coğrafi deyil – siyasi, iqtisadi, sosial və mənəvi qayıdışdır. Laçın artıq həsrətin deyil, qayıdışın, dağıntının deyil, quruculuğun; keçmişin deyil, gələcəyin ünvanıdır”.
