Birləşmiş Ərəb Əmirlikləri (BƏƏ) səhralaşma və quraqlıqla mübarizə məqsədilə yeni texnologiyalar və elmi həllər tətbiq edir.
Aktualinfo Media Qrup WAM informasiya agentliyinə istinadən xəbər verir ki, ölkə 2022-2030-cu illər üçün Səhralaşma ilə Mübarizə üzrə Milli Strategiya çərçivəsində torpaqların bərpası, su ehtiyatlarının qorunması və yaşıllıqların artırılması istiqamətində layihələr həyata keçirir. Strategiyanın əsas məqsədləri arasında deqradasiyaya uğramış torpaqların böyük hissəsinin bərpası, kənd təsərrüfatında səmərəliliyin artırılması və təmizlənmiş sudan təkrar istifadənin genişləndirilməsi yer alır.
BƏƏ quraqlıq şəraitinə uyğun kənd təsərrüfatı bitkilərinin yetişdirilməsi, dron texnologiyalarından istifadə, su anbarlarının tikintisi və meşəlik ərazilərin genişləndirilməsi istiqamətində tədbirlər görür. Ölkədə 109 su bəndi fəaliyyət göstərir və onların ümumi tutumu 90 milyon kubmetrdən çoxdur. Ölkə, həmçinin quraqlığa davamlılığın artırılması üçün beynəlxalq təşəbbüslərdə iştirak edir və səhralaşmaya qarşı qlobal əməkdaşlığın genişləndirilməsini dəstəkləyir.
