2026-cı il mayın 18-də Bakı daha bir mühüm beynəlxalq tədbirə ev sahibliyi etdi. Dünyanın müxtəlif ölkələrindən minlərlə nümayəndənin qatıldığı Ümumdünya Şəhərsalma Forumunun 13-cü Sessiyası (WUF13) Azərbaycanın qlobal şəhərsalma və dayanıqlı inkişaf sahəsində artan rolunu bir daha nümayiş etdirdi. Forumun açılış mərasimində çıxış edən Azərbaycan Prezidenti İlham Əliyev tədbirin əhəmiyyətindən, müasir urbanizasiya çağırışlarından və Azərbaycanın bu istiqamətdə həyata keçirdiyi layihələrdən danışdı.
Prezident çıxışında vurğuladı ki, Bakı son illərdə beynəlxalq tədbirlərin keçirildiyi əsas platformalardan birinə çevrilib. COP29-dan sonra WUF13 kimi nüfuzlu bir forumun Azərbaycanda təşkil olunması ölkənin beynəlxalq etimad və əməkdaşlıq mühitində mühüm mövqeyə sahib olduğunu göstərir. Dövlət başçısı qeyd etdi ki, forumda 182 ölkədən on minlərlə nümayəndənin iştirakı qlobal şəhərsalma məsələlərinə artan marağın göstəricisidir.
Çıxış zamanı Prezident İlham Əliyev Azərbaycanın şəhərsalma sahəsində keçdiyi inkişaf yoluna da toxundu. O bildirdi ki, Bakı şəhəri tarixi irslə müasir memarlığın harmoniyasını özündə birləşdirən nadir paytaxtlardan biridir. Son illərdə şəhərdə həyata keçirilən infrastruktur layihələri, yeni parklar, nəqliyyat sistemləri və ictimai məkanlar paytaxtın müasir urbanizasiya modelinə çevrilməsinə səbəb olub.
Prezident xüsusilə azad edilmiş ərazilərdə aparılan yenidənqurma işlərini forum iştirakçılarının diqqətinə çatdırdı. Bildirildi ki, həmin ərazilərdə “ağıllı şəhər” və “ağıllı kənd” konsepsiyaları əsasında müasir yaşayış məntəqələri qurulur. Yaşıl enerji, rəqəmsal idarəetmə, ekoloji yanaşma və innovativ texnologiyalar bu layihələrin əsas prioritetlərindən biridir. Bu yanaşma Azərbaycanın gələcək şəhərsalma strategiyasının dayanıqlı inkişaf prinsiplərinə əsaslandığını nümayiş etdirir.
Forum çərçivəsində urbanizasiya, iqlim dəyişikliyi, yaşayış mühitinin yaxşılaşdırılması və şəhərlərin gələcəyi ilə bağlı qlobal müzakirələrin aparılması da xüsusi əhəmiyyət daşıyır. Prezident İlham Əliyev çıxışında beynəlxalq əməkdaşlığın vacibliyini vurğulayaraq qeyd etdi ki, şəhərlərin davamlı inkişafı üçün dövlətlər arasında təcrübə mübadiləsi və birgə fəaliyyət mühüm rol oynayır.
Bakıda keçirilən Ümumdünya Şəhərsalma Forumunun 13-cü Sessiyası Azərbaycanın beynəlxalq nüfuzunun artmasının, eyni zamanda ölkənin müasir və dayanıqlı şəhərsalma sahəsində həyata keçirdiyi siyasətin dünya miqyasında maraq doğurduğunun növbəti göstəricisi oldu.
Günel Əbdürəhmanova,
Yeni Azərbaycan Partiyasının məsləhətçisi
