2026-cı il martın 11-də Bakıda baş tutan mühüm görüş Azərbaycan ilə Avropa İttifaqı arasında münasibətlərin yeni mərhələyə qədəm qoyduğunu bir daha nümayiş etdirdi. Həmin gün Azərbaycan Respublikasının Prezidenti İlham Əliyev Avropa İttifaqı Şurasının Prezidenti Antonio Costanı qəbul etdi və görüş zamanı iki tərəf arasında əməkdaşlığın perspektivləri, enerji təhlükəsizliyi, iqtisadi əlaqələr və regional əməkdaşlıq məsələləri geniş müzakirə olundu. Prezident İlham Əliyevin səfər zamanı verdiyi bəyanat Azərbaycan–Avropa İttifaqı münasibətlərinin strateji mahiyyətini və gələcək inkişaf istiqamətlərini aydın şəkildə ortaya qoydu.Prezident İlham Əliyev çıxışında qeyd etdi ki, Azərbaycan ilə Avropa İttifaqı arasında əlaqələr hazırda çox fəal inkişaf mərhələsindədir. Onun sözlərinə görə, müxtəlif səviyyələrdə aparılan dialoq iki tərəf arasında etimadın və qarşılıqlı maraqların möhkəm olduğunu göstərir. Xüsusilə Avropa Komissiyasının nümayəndələrinin son illərdə Azərbaycana tez-tez səfərlər etməsi əməkdaşlığın intensiv xarakter aldığını sübut edir. Prezident İlham Əliyev bu səfərlərin siyasi və iqtisadi münasibətlərin daha da dərinləşməsinə töhfə verdiyini vurğuladı.Azərbaycan lideri iqtisadi göstəricilərə də xüsusi diqqət çəkdi. O bildirdi ki, cari ilin yanvar ayında Azərbaycanın ümumi ticarət dövriyyəsinin təxminən 50 faizi Avropa İttifaqı ölkələrinin payına düşüb. Bu fakt Avropa İttifaqının Azərbaycan üçün əsas ticarət tərəfdaşı olduğunu açıq şəkildə göstərir. Prezident İlham Əliyev əminliklə qeyd etdi ki, yeni layihələrin həyata keçirilməsi və qarşılıqlı investisiya imkanlarının genişlənməsi nəticəsində ticarət dövriyyəsi yaxın illərdə daha da artacaq.
Azərbaycanın Avropa iqtisadi məkanında fəal iştirak etməsi də Prezident İlham Əliyevin vurğuladığı mühüm məqamlardan biri oldu. O bildirdi ki, Azərbaycan yalnız enerji ixrac edən ölkə kimi deyil, eyni zamanda Avropada investisiya yatıran etibarlı tərəfdaş kimi çıxış edir. Bu yanaşma Azərbaycanın beynəlxalq iqtisadi əlaqələrdə aktiv və təşəbbüskar rol oynadığını göstərir.
Enerji sahəsində əməkdaşlıq isə Azərbaycan–Avropa İttifaqı münasibətlərinin əsas sütunlarından biridir. Prezident İlham Əliyev xatırlatdı ki, 2022-ci ildə Avropa Komissiyası ilə imzalanmış enerji sahəsində strateji tərəfdaşlıq haqqında sənəd bu əməkdaşlığı daha da gücləndirib. Həmin sənəd Azərbaycanın Avropanın enerji təhlükəsizliyində oynadığı rolu əhəmiyyətli dərəcədə artırıb və tərəflər arasında uzunmüddətli əməkdaşlıq üçün möhkəm hüquqi baza yaradıb.Bu gün Avropa İttifaqının artıq 10 üzv dövləti Azərbaycandan qaz alır. Ümumilikdə isə Azərbaycan qazını idxal edən ölkələrin sayı 16-ya çatıb. Bu göstərici Azərbaycanın qlobal enerji bazarında mühüm mövqeyə malik olduğunu göstərir. Prezident İlham Əliyevin sözlərinə görə, boru kəmərləri vasitəsilə bu qədər ölkəyə qaz təchiz edən dövlətlərin sayı dünyada çox azdır və Azərbaycan bu sahədə aparıcı mövqelərdən birini tutur.Azərbaycan qazının Avropa üçün əhəmiyyəti xüsusilə son illərdə daha da artıb. Avropa bazarı hazırda Azərbaycanın ümumi qaz ixracının təxminən yarısını təşkil edir və bu bazarda böyük artım potensialı mövcuddur. Prezident İlham Əliyev qeyd etdi ki, ölkəmiz qaz hasilatını artırmaq üçün yeni layihələr üzərində fəal şəkildə işləyir.Dövlət başçısı bildirdi ki, yaxın illərdə yeni yataqlardan qaz hasilatına başlanacaq və nəticədə Azərbaycanın ixrac imkanları daha da genişlənəcək. Planlara əsasən, növbəti iki-üç il ərzində hazırkı həcmlə müqayisədə ən azı 10 milyard kubmetr əlavə qaz hasil ediləcək. Bu isə Avropanın enerji təhlükəsizliyinə Azərbaycanın töhfəsini daha da artıracaq.
Bütün bu faktlar göstərir ki, Prezident İlham Əliyevin rəhbərliyi ilə Azərbaycan Avropa ilə strateji tərəfdaşlıq münasibətlərini davamlı şəkildə inkişaf etdirir. Onun uzaqgörən siyasəti nəticəsində ölkəmiz həm regional, həm də qlobal miqyasda etibarlı enerji tərəfdaşı və güclü iqtisadi aktor kimi mövqeyini möhkəmləndirir. Bu siyasət Azərbaycanın beynəlxalq nüfuzunun artmasına və Avropa ilə qarşılıqlı faydalı əməkdaşlığın daha da genişlənməsinə xidmət edir.
Pərvin Cəfərli,
Yeni Azərbaycan Partiyası,məsləhətçi
