Xocalı Soyqırımı Memorial Kompleksinin açılışı Azərbaycan tarixində mühüm siyasi və mənəvi hadisə kimi yadda qaldı. Prezident İlham Əliyevin mərasimdəki çıxışı Xocalı faciəsinin unudulmadığını, əksinə, tarixi ədalətin artıq bərpa olunduğunu nümayiş etdirdi. Azad Xocalıda memorialın ucaldılması xalqın iradəsinin və dövlətin qətiyyətli siyasətinin nəticəsi kimi qiymətləndirilir.
Xocalı soyqırımı XX əsrin ən ağır faciələrindən biri olaraq yüzlərlə günahsız insanın həyatına son qoydu və Azərbaycan xalqının yaddaşında dərin iz buraxdı. Uzun illər ərzində həqiqətlərin dünyaya çatdırılması istiqamətində aparılan siyasi və ictimai fəaliyyət nəticəsində bu hadisə beynəlxalq səviyyədə daha geniş tanınmağa başladı. “Xocalıya ədalət!” təşəbbüsü informasiya mübarizəsində mühüm rol oynadı və Azərbaycanın haqq səsini qlobal miqyasda gücləndirdi.
Prezident çıxışında ədalətin mərhələli şəkildə təmin edildiyini vurğuladı. Güclü dövlət quruculuğu, diplomatik fəaliyyət və hərbi hazırlıq nəticəsində Azərbaycan Vətən müharibəsində qələbə qazandı, ardınca həyata keçirilən tədbirlər ölkənin tam suverenliyini təmin etdi. Beləliklə, Xocalı faciəsinin siyasi və tarixi qiyməti real nəticələrlə təsdiqləndi.
Memorial Kompleks milli yaddaşın qorunmasına xidmət edən mühüm rəmzdir. Bu abidə həm keçmişin ağrısını xatırladır, həm də gələcək nəsillərə güclü dövlətin əhəmiyyətini anlatır. Xocalının azad torpağında ucalan memorial Azərbaycan xalqının dözümünün, birliyinin və qələbə əzminin ifadəsinə çevrilib.
Bu gün Xocalı yalnız faciənin deyil, həm də ədalətin bərpasının simvoludur. Azərbaycanın gücü və milli həmrəyliyi göstərdi ki, tarix unudulmur, haqq gec də olsa öz yerini tapır.
Aytac Məhərrəmli,
YAP Nizami rayon təşkilatının məsləhətçisi
